Qeveria miratoi sot projekt buxhetin për vitin 2024, duke synuar mbështetjen e ekonomisë dhe punësimin.
Në emisionin “Sheshi i Dollarit” në ABC, eksperti i ekonomisë Bardhi Sejdarasi u shpreh se është e domosdoshme që paga mesatare të shkojë në 900 euro.
“Është një buxhet i njohur dhe këto janë të përcaktuara. Janë reforma të njëjta që duhet të realizohen. Kujtoj strategjinë e reformës së pagesës që ka nisur shumë më herët. Pra kemi nevojë që paga mesatare të shkojë në 900 euro. Tani ka edhe një favor tjetër, pasi niveli i euros është i tillë që e bën më të lehtë. Pra e njëjta gjë është edhe me pensionet, pasi ka një strategji edhe për pensionet. Buxheti i 2024, merr parasysh indeksimin e pensioneve, por ne do të kemi një rritje pagash,. Pra këto janë të planifikuara”, tha ai.
Eksperti i ekonomisë Bardhi Sejdarasi, në studion e “Sheshi i dollarit” në ABC e vlerësoi një hap pozitiv daljen e Shqipërisë nga lista gri.
Gjatë intervistës, Sejdarasi theksoi se historia ka nisur në 2011, ku vendi ynë ka qenë në listën e zezë, ndërsa 2014-ta ishte viti kur edhe doli nga kjo listë e zezë.
“Shqipëria largohet nga lista gri dhe kjo është çështje imazhi të mirë, çështje partneriteti e rëndësishme. Më shumë është çështje imazhi, e partneritetit me partnerë ndërkombëtar, e investitorëve të cilët financojnë qeverinë shqiptarë nëpërmjet obligacioneve tani. Vetëm në obligacionin e fundit kemi 115 investitorë të cilët janë pjesë. Cilësia që ka një qeverisje që nuk është më nën mbikëqyrje është pozitive për marrëdhëniet që kemi në tregun ndërkombëtar, për transaksionet që bëjmë. Është çështje e imazhit të mirë, është çështje mirë-menaxhimi dhe është çështje që do të shkojë tek pjesa e integrimit me BE me të gjitha detyrimet që ka qeveria shqiptare për të qenë pjesë e BE tani që kemi negociata të hapura, pra është një lajm i mirë”, u shpreh ai.
Gjithashtu Sejdarasi shton se dalja nga lista gri nuk do të thotë se çdo gjë duhet të qëndrojë në normalitet, por duhet pasur shumë kujdes sepse kjo listë ndryshon sipas tij.
“Në 3 dekada që jemi anëtar të FMN, është viti i parë që ka një element pozitiv. Viti i parë që deklarata e sotme e Fondit Monetar Ndërkombëtar quhet e mirëqenë dhe ka një besueshmëri më të lartë. Lista gri hartohet çdo vit, Në vitin 2014 me shumë vështirësi kemi dalë nga lista e zezë. Por nuk duhet të mendojmë çdo gjë tani është normal, sepse kjo listë është e përvitshme. Pra duhet kujdes i madh dhe një insistim i autoriteteve për të qëndruar në këtë nivel”, theksoi ai.
