Një makinë është përplasur dhe ka shpërthyer në urën kufitare SHBA-Kanada, duke shkaktuar një frikë të madhe sigurie në prag të Ditës së Falënderimeve.
Dy personat në automjet humbën jetën dhe një agjent kufitar amerikan u plagos, por guvernatori i Nju Jorkut përjashtoi mundësinë se ngjarja ishte një sulm terrorist.
Makina po udhëtonte nga ana e kufirit të Nju Jorkut në Urën e Ylberit kur u përplas në një pikë kontrolli.
Incidenti pranë Ujëvarës së Niagarës solli mbylljen e katër urave në kufirin më të gjatë ndërkombëtar në botë.
Shpërthimi ndodhi rreth orës lokale 11:30 të mërkurën, në prag të festës së Falenderimeve në SHBA.
Shërbimet e trenave midis Nju Jorkut dhe Kanadasë u ndërprenë përkohësisht dhe oficerët në aeroportet Buffalo dhe Niagara Falls hynë në një gjendje të lartë alarmi duke kontrolluar makinat për eksplozivë.
Incidenti ngjalli frikën e një sulmi të mundshëm terrorist dhe spekulimet e pabaza u përhapën në internet në lidhje me një kërcënim të mundshëm për Paradën e Ditës së Falenderimeve të Macy në New York City.
Por disa orë pas shpërthimit, guvernatori i Nju Jorkut Kathy Hochul u tha gazetarëve: “Bazuar në atë që dimë në këtë moment, nuk ka asnjë shenjë të aktivitetit terrorist në lidhje me këtë përplasje.”
Dy viktimat ishin çift bashkëshortësh. Burri ishte drejtuesi i mjetit dhe gruaja e tij ishte pasagjere, thanë zyrtarët.
