Nga Nikoll Lesi
Presidenti Ilir Meta dje shfuqizoi dekretin për zgjedhjet e datës 30 qershor, ditë kur parashikohej se do përplaseshin turmat e PS me popullin opozitar. Pra shmangu luftën civile. Ndërkohë kryeministri Rama vijon edhe sot takimet elektorale për zgjedhjet e datës 30 qershor. Dekreti i Presidentit ka fuqi kushtetuese ndaj nuk ka se si të zhvillohen zgjedhjet, kur nuk ka dekret!
Dekreti i Presidentit, sipas konstitucionalistëve, rrëzohet vetëm me vendim të Gjykatës Kushtetuese, por siç dihet kryeministri e ka shkrirë dhe shkatërruar këtë gjykatë. Pra nuk ka gjykatë që mund të gjykojë dekretin e shfuqizimit të Presidentit Meta. Ndaj mbetet në fuqi dhe KQZ duhet, sapo ti shkojë me shkrim dekreti i ri, të bllokojë me një vendim fushatën elektorale dhe të presë në caktimin e një date të re për zgjedhjet vendore.
Dekreti presidencial realisht shpëtoi vendin nga kaosi dhe një përplasje e madhe civile, pasi Rama kërkon të shkojë me zor në votime, kurse opozita është betuar se nuk do ta lejojë për zgjedhje farsë.
Sot nga qyteti i Burrelit kryeministri Rama deklaroi një veprim që do ti kushtojë shtrenjtë atij, por pikësëpari popullit. Ai tha se dekretin nuk e njeh, pra nuk do ta zbatojë dhe se me 30 qershor do të shkojë në votime për t’i marrë të gjitha bashkitë e Shqipërisë.
Kjo që tha kryeministri është një çmenduri e madhe. Ai kujton se ndodhet në një mbretëri ku mund të veprojë e bëjë si të dojë. Ai po bën realisht Grusht Shteti.
Edi Rama tha po sot në Burrel “E drejta e Ilir Metës për të qëndruar në atë zyrë ka mbaruar”, duke paralajmëruar se do të kërkojë shkarkimin e Ilir Metës si President i Shqipërisë. Por kjo është një vetvrasje për kryeministrin. Pasi prapë nuk e shkarkon dot pasi nuk ka Gjykatë Kushtetuese. Kështu e ka të shkruar Kushtetuta: Kushtetuesja vendos.
E sigurtë se Edi Rama po futet në shtegun e vetvrasjes dhe ku më pas asnjë nga pjestarët e oligarkisë apo edhe krimit nuk do ti heqë dorën nga kembëza, por do ti thonë “Jepi!”.
E habitshme se si asnjë në PS apo në grupin parlamentar nuk e këshillon këtë njeri me emrin Edi Rama. Si ka mundësi që Edi Rama ka vendosur ta mbyllë karrierën e tij duke u futur bunkerëve të kohës së Enverit, nga tuneli poshtë kryeministrisë e për të dalë pa frymë në malin e Dajtit. Sepse opozita protestën tjetër nuk mbahet më, pasi nuk ka zgjedhje edhe me dekret, kurse Rama don të shkojë në Grusht Shteti.
Tashmë opozita nuk mbahet më, pas kësaj që sot deklaroi kryeministri nga Burreli.
Dekreti i shfuqizimit ishte një varkë shpëtimi për Edi Ramën. Realisht kështu është. Bile Andi Bushati, dje pas dekretit, bëri një shkrim kritik ndaj Metës, pasi thoshte se nuk duhej dekreti, por të lihej Rama ti merrte të gjitha pushtetet dhe më pas të mbytej mes pushtetit nga revolucioni popullor që do ta fshinte nga historia. Por “gomonen” që i hodhi Meta, kryeministri nuk e do, pasi e do fundin me mbytje.
Ja që ka njerëz që kështu e duan fundin e tyre! Kështu e do fundin Edi Rama dhe ata që sot e mbështesin për tenderime, koncensione, lekë, leje ndërtimi, etj do të thonë më pas se “shyqyr që iku, se na mori frymën”.
Sido ta marrësh, dekreti i djeshëm ishte shpëtimtar për popullin, por edhe për vetë PS-në. Kryeministri ka ikur nga kjo botë mendjesh të ftohta dhe jeton me mendje si në botën arabe.
Por një këshillë e kam për kryeministrin: Zoti Rama, lëre një tunel për të ikur në malin e Dajtit!
