Kryeministri Edi Rama nuk e ka pritur aspak mirë informacionin se gazeta Bild do të publikojë 16 përgjime të reja për shit-blerjen e votave në zgjedhjet e përgjithshme të 2017-ës. Nga qyteti i Pogradecit, ai shpërtheu ndaj prokurorit Besim Hajdarmataj, që sipas tij, ai ia ‘shiti’ dosjen 339 Partise Demokratike.
“Edhe përgjimet që dolën, dolën nga valixhja e mbyllur. Në vend që të hetoheshin dhe të ndëshkoheshin të gjitha ata që kanë apo s’kanë lidhje me çfarë thonë dhe nga sa pason në të vërtetë prova. Ai prokurori famëkeq i njohur si shërbëtor i familjes së Sali Berishës në vend që t’i hetohet dhe t’i çonte në gjykatë në bazë provash, kurrë nuk e bëri”, deklaroi Rama, që dukej i trembur.
Kryeministri për asnjë çast nuk e mohoi vërtetësinë e përgjimeve, veçse u mor me faktin që rivalët e tij politike, i kanë ‘eksportuar’ deri te BILD.
“Hapin valixhen, e nxjerrin përgjime, i hedhin në Gjermani dhe duan ta bëjnë për budalla popullin duke thënë i zbuloi Gjermania, në vend që hetimet të dalin këtu. Për ta drejtësia ka qenë gjithmonë një bisht i interesave të tyre familjare, partiake dhe asnjëherë një mekanizëm që duhet të funksionoj në rrugën e një vendi që bëhet shtet. Dhe sot duan përsëri që populli t’i hapë rrugë atyre siç dikush i hap rrugë budallait kur i shfaqet përballë”, theksoi Edi Rama.
