Presidenti i Dhomës së Tregëtisë Britani-Shqipëri Zenel Hoxha në një lidhje telefonike për Fax News nga Londra deklaroi se i ka nisur një letër kryeministrit britanik Boris Johonson që të amnistohen qytetarët e paligjshëm shqiptarë në Britani.
‘I kam dorëzuar një letër që i kërkoj në emër të komuniteteve për të marrë në konsideratë integrimin e plotë të bashkëatdhetarëve si nga Shqipëria dhe në vende të tjera të botës, në këtë kohë kaq të rrezikshme.
Të marrin në konsideratë elemetin bazë të drejtave të njeriut që të integrohen si të gjithë qytetarët britanikë me të drejta të ligjshme’.
Po ashtu Hoxha theksoi edhe faktin se në këtë situatë të rëndë, shumë shqiptarë janë të pa regjistruar në sistemin britanik shëndetësor.
‘Ky virus me pasoja katastrofike do të jetë me pasoja të mëdha për ato që nuk janë regjistruar në sistemin shëndetësor britanik.
Ka shumë shqiptarë të paregjistruar, por janë edhe nga vende të tjera të botës. Do të ketë një fazë mbrojtëse për të gjithë popullin britanik. Do të ketë pasoja katastrofike. Për çdo rast do të jenë në gjendje të marrin shërbimin shëndetësor, nëse do të jenë të ligjshëm.
Ne duhet të bashkohemi me qëllim që ta përballojmë këtë katastrofë të papritur dhe të paprecedentë të historisë së njerzimit. Duhet të dini që mundësia më e mirë është përmes bashkëpunimit ndërmjet njëri tjetrit. Uroj që kjo të kalojë pa dëmë. Dua tu them shqiptarëve të gjejnë mënyra për të bashkëpunuar.’- tha Hoxha.
