Qeveria italiane po diskuton përgatitjen për të ashtuquajturën “faza 2”, e cila pritet të rivë në punë një pjesë të shoqërisë dhe disa prej sektorëve që qëndrojnë mbyllur prej muajit mars.
Italia po përgatitet për një riaktivizim gradual të jetës publike, e cila pushon prej datës 10 mars.
Vendi europian më i goditur nga pandemia e koronavirusit do të nisë lehtësimet e para të karantinës nga data 27 prill, dhe rregullat do të qartësohen gradualisht pas datës 4 maj që qytetarët italianë të mund të bashkëjetojnë me koronavirusin.
Gjatë kësaj periudhe të titulluar “faza 2” do të vihen në punë fillimisht sektorët e prodhimit, në javën e dytë të majit do fillohet me dyqanet dhe në javën e tretë, po shihet mundësia e rihapjes së bareve dhe restoranteve.
Më shumë kujdes do të tregohet për sektorët e kulturës dhe turizmit, daljet në natyrë për ushtrime fizike do lejohen me maska, ndërsa disa zona të kuqe të infeksionit do të vijojnë nën regjimin e rreptë.
Institucionet e besimit, ndërkohë, si kishat, po mundohen të bindin autoritetet për rikthimin e riteve fetare teksa shtohen tensionet sociale si pasojë e rritjes së varfërisë dhe papunësisë nga pandemia.
Në mbarë vendin mësohet se është rritur me 40 për qind numri i italianëve që po ndihmohen me ushqime nga shoqata bamirëse, me rajonet më të prekura kryesisht ato jugore të Kampanies, Kalabrisë dhe Siçilisë.
Hapja e meshave publike, e funeraleve, e pagëzimeve dhe martesave është propozuar të ndodhë duke nisur nga e diela e 3 majit, por pjesëmarrësit duhet të respektojnë rregullat e distancimit social dhe të jenë të pajisur me maska dhe doreza.
Detajet për lehtësimet e masave aktuale është planifikuar të bëhen publike këtë fundjavë nga kreu i qeverisë italiane, Xhuzepe Konte.
Italia të mërkurën kaloi shifrën e 25 mijë viktimave nga koronavirusi, teksa 187 mijë persona raportohet të jenë infektuar dhe gati 55 mijë janë shëruar.
