Partis Saint Germain – Bayern Munchen është finalja e madhe e këtij sezoni në Champions League.
Bavarezët mposhtën me lehtësi 3-0 skuadrën e Lyonit në gjysmëfinalen e kompeticionit më të rëndësishëm në Europë.
Dy gola u realizuan nga Serge Gnabry gjatë pjesës së parë të lojës, ndërsa në fraksionin e dytë gjermanët administruan avantazhin.
Vetëm 18 minuta i mjaftuan talentit gjerman që të kalonte në avantazh Bayernin ndërsa 5 minuta nga fundi i pjesës së parë Gnabry realizoi edhe të dytin.
Vlen të theksojmë që në minutën e 58’ skuadra gjermane ishte vërtet në vështirësi pasi Lyoni doli bukur me kundërsulm duke rrezikuar kundërshtarin. Meritë e padiskutueshme e Manuel Neuer i cili bëri një ndërhyrje të pabesueshme duke neutralizuar gjuajtjen e kundërshtarit.
Pas dopjetës së Gnabry, tabelës së golashënuesve nuk kishte si t’i mungonte Robert Lewandowski i cili realizoi në minutën e 88′.
Pas kësaj fitore, Bayerni do të përballet në finale me PSG-në, duel i cili do të luhet ditën e diel më 23 gusht.