Ish ministri i Financave Arben Malaj tha se agresiviteti ndërpatiak po shkon drejt rritjes, ndërsa ka shumë mundësi bashkëpunimi mes palëve.
Duke komentuar zhvillimet e fundit në vend në studion e Syri TV, Malaj tha se fituesin e vërtetë të zgjedhjeve e vendosin vetëm gjykatat.
“Po rritet agresiviteti ndërpartiak. PD po mbështet kryetarët e bashkive të mos dorëzojnë detyrën. Çfarë do ndodhë? Mundësitë për marrëveshje politike janë të shumta, por kur gjykatat të vendosin që fitues është x apo y, nuk ke më mundësi të tjera. Ministria e Financave bën ndryshimet në thesar dhe ti nuk ndan as rroga, as sigurime shoqërore, asgjë. Ideja që do të protestojmë, ideja që do ti çojmë në gjykata është rruga më e mirë se sa kur kërcënon me mosdorëzim”, u shpreh Malaj.
Në lidhje me njohjen e zgjedhjeve të 30 qershorit, Malaj theksoi se drejtuesja e vëzhguesve të OSBE/ODIHR, Audry Glover, i vlerësoi, por nuk i certifikoi ato.
“Glover ka një eksperiencë të gjatë. E njeh Shqipërinë prej vitesh. Ajo dha një vlerësim, por jo një certifikim. Iu bashkua vendimit të SHBA dhe BE. Vlerësimi që bën ODIHR shkon në çdo kancelari. Drafti i parë tregoi që procesi kishte probleme shumë të mprehta. Duhet pranuar që jemi në krizë”, deklaroi ish ministri.
Pyetjes rreth reagimeve të presidentit dhe nismës për shkarkimin e tij, Malaj ju përgjigj se tendenca për ta kthyer presidentin në honorifik nuk është gjëja e duhur.
“Politikanët të krahut që unë i përkas, thonë që jemi republikë parlamentare. Por funksionimi është check and balance. Tendenca për ta kthyer presidentin në honorifik nuk është e duhura. Duhet të kemi balanca. Vërtetë jemi republikë parlamentare por SHISH, Trupi Diplomatik, Shtabi i Përgjithshëm emërohen nga presidenti i Republikës”, tha Malaj.
