Nga Kastriot Dervishi
Qenka e thënë që këta me shkollë Sigurimi të jenë në krye të punëve të drejtësisë së ‘re’. Prokurori i përgjithshëm dje na zhgënjeu me dy kumtime.
Së pari na prezantoi zëvendësin, një xhaketë e vjetër në moshë pensioni me shkollë Sigurimi, emrin e të cilit, të pandehurit e tij (të përndjekur politikë) nuk e kanë harruar.
Prokurori merr pjesë në ekspozita për krimet e Sigurimit, por ama në zyrë do ata që kanë mbaruar shkollën e Sigurimit.
Së dyti na foli për ‘digjitalizim të dosjeve’ të prokurorisë, në një kohë që institucioni ka probleme themelore me arkivimin e tyre.
Dihet se me anën materiale dhe administrative të sistemit të drejtësisë (duhet) të merret Ministria e Drejtësisë dhe jo prokuroria apo gjykatat. Këta tanët duan t’i bëjnë vetë edhe këto gjëra.
Kjo ‘reforma e re’ e një shteti rrumpallë, ku propaganda është themeli i gjithçkaje, sigurisht as u kujtua se ku i arkivon dosjet sistemi i drejtësisë. I duket boll një depo në Lundër, ndërsa paranë e derdhin pafund në burgje.
Prokurori i përgjithshëm duhet të rrisë kërkesat ndaj Ministrisë së Drejtësisë për sistemimin e dokumentacionit të përhershëm. Njihet fakti që sekretari-arkivat e prokurorisë janë lëmsh prej dhjetëra vitesh.
Po ashtu, dergjen në bodrume dengje letre të sektorëve të ish hetuesisë. Ato nuk dinë ende se si do vejë halli i tyre sepse shteti nuk ndërton godina dhe nuk investon fare në këtë drejtim.
Do ishte mirë të rritej dijenia e prokurorëve në fushën e përpilimit të dokumenteve (gjenden pafund raste të keqshkrimit të gjuhës).
Digjitalizimi bëhet në arkiva (ka karakter të përhershëm) dhe jo në sekretari-arkiva.
