Rigoni është një bimë mjekësore që përdoret jo vetëm në kuzhinë, por edhe për trajtimin e shumë problemeve shëndetësore.
Këtu përfshihet kolla, e ftohura, problemet me tretjen dhe dhimbjet.
Në këtë artikull të AgroWeb.org do të mësoni se si të shfrytëzoni vlerat e rigonit për rrugët e frymëmarrjes dhe kundër kollës.
Si të përgatisni vajin esencial të rigonit
Merrni rigon të thatë dhe mbushni një filxhan çaji.
Rigonin duhet ta shtypni njësoj si hudhrën në mënyrë që ai të çlirojë vajrat e tij.
Mbushni një filxhan tjetër me vaj ulliri dhe ngroheni duke e vendosur brenda një tenxhereje me ujë të nxehtë.
Ngrohja e vajit përmirëson ndërthurjen e rigonit me vajin.
Pasi të keni ngrohur vajin, hidheni bashkë me rigonin në një kavanoz qelqi të pastër.
Përziejini mirë me një lugë druri dhe mbylleni kapakun.
Lëreni kavanozin në parvazin e një dritareje.
Kavanozi duhet të qëndrojë mbyllur minimalisht dy javë por gjatë kësaj kohe duhet ta tundni atë herë pas here.
Kullojeni vajin nëpërmjet një nape të pastër dhe vajin e ri hidheni në një shishe qelqi të cilën duhet ta vendosni në një vend të errët e të freskët ose në frigorifer.
Ekspertët rekomandojnë marrjen e tre deri në pesë pikave të vajit në ditë si kurë kundër kollës dhe simptomave të të ftohurës.
Ky vaj është efikas kundër alergjive, sinozitit, artritit, infeksioneve të veshit dhe diaresë.
Përdoreni përreth një javë.
Si të përgatisni shurupin e kollës me rigon
Ky shurup përgatitet me gjysëm filxhan çaji me mjaltë, dy thelbinj hudhër dhe dy tufa me rigon të freskët. Mund të përdorni si alternativë 2 lugë çaji rigon të thatë.
Merrni një tenxhere dhe hidhni gjysëm filxhani çaj me ujë.
Shtoni thelbinjtë e hudhrës dhe gjethet e rigonit dhe ziejini për 5 minuta.
Pasi të ftohet, kullojeni dhe hidhini mjaltin.
Pijeni për 3-4 ditë nga një filxhan.
AgroWeb.org ju rekomandon edhe një mënyrë alternative:
Merrni një kavanoz qelqi 250 ml. Në fund të tij vendosni disa gjethe rigoni, 2 thelbinj hudhër, disa feta limoni dhe gjysëm qepë të prerë në feta.
Shtoni gjysëm filxhan çaji me mjaltë dhe më pas ujin.
Mbylleni kavanozin, lëreni të qëndrojë gjithë natës dhe pini lëngun gjatë ditës.
Shurupin mund ta merrni rregullisht kundër kollës apo problemeve me fytin.
Sa herë që keni kollë mund të merrni një lugë të plotë gjelle.
Ky shurup nuk është i rekomanduar për fëmijët nën moshën 2 vjeç./AgroWeb
