Familjarët e shqiptarit të vrarë të premten në mëngjes në një bllok rezidencial në Ekuador, u kërkojnë autoriteteve mbrojtje dhe denoncojnë se asnjë hetim nuk është kryer për të gjetur vrasësit.
45 vjeçari shqiptar, Adriatik Tresa u ekzekutua me gjashtë plumba brenda shtëpisë së tij nga persona të maskuar si policë.
Pamjet e kamerave të sigurisë të kompleksit, tregojnë se si vrasësit e maskuar dhe të armatosur, nënshtrojnë rojet private duke hapur dyert dhe duke hyrë brenda ndërtesës.
Në video mund të shihni se si 6 njerëz dalin nga dy automjete të ndryshme; shumica kishin xhupa të ngjashëm me ato që veshin oficerët e njësive speciale. Njëri prej tyre mbante pushkën.
Brenda sekondave ata arritën në shtëpinë e Adriatik Tresës, duke e ekzekutuar atë. Tresa kishte shkuar në Ekuador në vitin 2010, duke marrë edhe kartë identiteti vendase.
Sipas autoriteteve, ngjarja ka lidhje me trafikimin e drogës.
Walter Jaramillo, prokurori që ndoqi çështjen në shkallën e parë, raportoi se nga 8 personat e ndaluar paraprakisht, vetëm një u konfirmua në paraburgimin.
“Ata ndryshuan skenën e ngjarjeve. Kur ndryshuan skenën e ngjarjeve, ata morën dokumentacionin, celularët, supozohet se ata morën para që i kishte shtetasi shqiptar“, tha ai.
Hetimet për rastin janë duke vazhduar. Ndërkohë, të afërmit po bëjnë procedurat për të marrë trupin dhe po shqyrtohet mundësia për sjelljen e tij në Shqipëri.
