Universiteti i Mjekësisë dhe Fakulteti i Shkencave Mjekësore Teknike, pëmes një njoftimi në faqen zyrtare, ka bërë me dije se ka ndërruar jetë pedagogia dhe mjekja Obsetre-Gjinekologe Suela Muça. Nuk dihen ende shkaqet e vdekjes së mjekes së njohur në një moshë mjaft të re.
“Me hidhërim të thellë njoftojmë ndarjen nga jeta e Dr. Suela Muça, mjekes Obsetre-Gjinekologe dhe pedagoges së Fakultetit të Shkencave Mjekësore Teknike.
Dr. Muça u lind në vitin 07.02.1972. Në vitin 1997 u diplomua në mjekësi pranë Fakultetit të Mjekësisë, Universiteti i Tiranës dhe më pas në vitin 2002 u specializua si mjeke Obsetre-Gjinekologe. Dr. Muça ka punuar pranë Spitalit Gjinekologjik “Koço Gliozheni”. Prej më shumë se 10 vitesh Dr. Muça ishte pjesë e stafit akademik të Universitetit të Mjekësisë në Tiranë, pranë Fakultetit të Shkencave Mjekësore Teknike. Ajo ishte e karakterizuar nga sinqeriteti, mirësia dhe përkushtimi i lartë si mjeke dhe pedagoge.
Largimi nga jeta i Dr. Suela Muça lë pas një humbje të madhe për mjekësinë, universitetin, familjen, kolegët, studentët, pacientët e shumtë dhe cilindo tjetër që ka pasur fatin e mirë ta njohë. Universiteti i Mjekësisë dhe Fakulteti i Shkencave Mjekësore Teknike, përcjellin ngushëllimet më të sinqerta për familjarët dhe njerëzit e dashur”, njofton Universiteti i Mjekësisë dhe Fakulteti i Shkencave Mjekësore Teknike.
Sot ka ndërruar jetë edhe një mjek tjetër. Leonard Kamberi, mjek gjinekolog nga Vlora humbi betejën me Covid-19, pas dy javësh që ishte i shtruar tek Infektivi në Tiranë.
