Disa qytetarë të Tiranës së bashku me organizatën rinore GUXO kanë depozituar një kërkesë tek Komisioneri për Mbrojtjen e të Dhënave lidhur me punën e Patronazhistëve të PS-së.
Ata kërkojnë konstatim të paligjshmërisë të mbledhjes dhe përpunimit të të dhënave personale nga Partia Socialiste.
Një tjetër kërkesë e tyre është fshirja e çdo të dhëne personale nga serverat, kompjuterët dhe telefonat e Partisë Socialiste si dhe ndëshkimin e tyre.
Organizata GUXO thotë se ky është hapi i parë ligjor pas mbledhjes së nënshkrimeve të qytetarëve.
Postimi i plotë i GUXO:
162 qytetarë të Qarkut të Tiranës, përfaqësuar nga organizata rinore GUXO, kanë depozituar sot një kërkesë pranë Komisionerit për Mbrojtjen e të Dhënave, në të cilën kërkojnë: (i) konstatimin e paligjshmërisë së mbledhjes, përpunimit dhe publikimit të të dhënave personale nga Partia Socialiste; (ii) fshirjen e cdo të dhëne personale nga serverat, kompjuterët, telefonat dhe cdo pajisje tjetër elektronike e PS-së; dhe (iii) ndëshkimin me sanksione administrative të PS-së.
Ky hap i parë ligjor vjen pas procesit të mbledhjes së nënshkrimeve që GUXO ka kryer përgjatë muajit Maj në bashkitë Tiranë dhe Kamëz, me grupet e saj të vullnetarëve. Javës tjetër do të njoftoheni për hapat e ardhshëm ligjorë që do të ndërmarrim. Të rinjtë e konsiderojnë të papranueshme që të dhënat e tyre të mblidhen, përpunohen dhe publikohen në paligjshmëri për interesat elektorale të Partisë Socialiste apo cilësdo parti tjetër politike.
