Ish-ministri i Financave, Arben Malaj thotë se rritja e çmimeve do të ndikojë negativisht në ekonominë shqiptarë, ku më të goditura do të jenë familjet e varfra.
Profesori tha në emisionin “Breaking” në Top News, se rritja e çmimeve nuk është si pandemia dhe tërmeti, ndërsa shtoi se qeveria ka dështuar lidhur me reformat.
Ish-ministri kujtoi vendimin favorizues për jahtet, ku miliarderët vijnë dhe blejnë naftë lirë në Shqipëri, ndërsa fermerët e blejnë me 170 lekë litri.
“Nëse ka një trend rritës, që mund të jetë i përhershëm, siç po ndodh me ushqimet, duhet të mendohet një strategji. Kjo rritje do të prekë më të varfrit. Një inflacion i lartë godet ata me paga të ulëta dhe i bën të varfrit më të varfër. Këtë kosto duhet ta paguajmë të gjithë bashkë, nuk e mban dot vetëm qeveria.
Fermeri e merr me 170 lekë litrin e naftës, ndërsa Bezos që ka buxhetin e tetë viteve të Shqipërisë e merr më lirë. Të hiqet ai favorizimi që u bëhet jahteve.
Reformat kanë dështuar, ndërsa qeveria thotë se po na vjen një fatkeqësi”, tha Malaj.
Për shkak të një politike absurde fiskale, Shqipëria ja u shet karburantin jahteve me 0.58 dollarë për liter. Nafta e jahteve në Shqipëri nuk paguan akcize 350 lekë për litër, nuk paguan takse qarkullimi 270 lekë për litër, nuk paguan tvsh 300 lekë për litër.
