Përleshje të reja midis palestinezëve dhe policisë izraelite shpërthyen në Jerusalem të shtunën, duke lënë pas dhjetëra persona të plagosur, shumica nga ana e palestinezëve.
Mjekët palestinezë thanë se 90 palestinezë u plagosën. Policia izraelite tha të paktën një oficer ishte lënduar, shkruan BBC.
Dhuna vjen pas ditësh trazira për dëbimet e mundshme të palestinezëve nga toka e pretenduar nga kolonët hebrenj. Të premten, më shumë se 200 palestinezë dhe të paktën 17 policë izraelitë u plagosën në përleshje pranë xhamisë Al-Aqsa, thanë punonjësit e urgjencës dhe policia.
Kompleksi i xhamisë Al-Aksa të Jerusalemit është një nga vendet më të respektuara të Islamit, por vendndodhja e tij është gjithashtu vendi më i shenjtë në Judaizëm, i njohur si Mali i Tempullit. Kompleksi është një pikë e shpeshtë e dhunës, por e premtja ishte ndër më të këqijat në vite.
Kuarteti i negociatorëve të Lindjes së Mesme, SHBA, BE, Rusia dhe KB – të shtunën shprehën “shqetësim të thellë” rreth dhunës spirale.
Në një zhvillim të veçantë të shtunën, ushtria e Izraelit tha se një raketë u qëllua nga militantët palestinezë nga Rripi i Gazës i drejtuar nga Hamas në Izrael.
IDF nuk dha ndonjë detaj më shumë, por media izraelite raportoi se raketa ra në një fushë të hapur duke mos shkaktuar dëme.
Përleshjet e së shtunës shpërthyen në Portën e Damaskut pasi dhjetëra mijëra adhurues ishin lutur në xhaminë Al-Aqsa për Laylat al-Kadr, (Natën e Kadrit) nata më e shenjtë në muajin e agjërimit. Gjysmëhëna e Kuqe Palestineze tha se të paktën 90 palestinezë u lënduan dhe 14 u dërguan në spital.
Më herët të shtunën, policia izraelite kishte ndaluar dhjetëra autobusë që mbanin adhurues në xhami dhe një numër palestinezësh u arrestuan pas dhunës së të premtes.
“Ata nuk duan që ne të lutemi. Ka një luftë çdo ditë, çdo ditë ka përplasje. Çdo ditë ka telashe”, tha Mahmoud al-Marbua, 27 vjeç, për agjencinë e lajmeve Reuters.
Kryeministri i Izraelit Benjamin Netanyahu tha se vendi i tij po vepronte me përgjegjësi për të siguruar rend dhe ligj duke ruajtur lirinë e adhurimit.
Lideri palestinez Mahmoud Abbas dënoi ato që ai tha se ishin “sulmet mëkatare” të Izraelit.
Izraeli ka pushtuar Jeruzalemin Lindor që nga lufta e Lindjes së Mesme 1967 dhe e konsideron të gjithë qytetin kryeqytetin e tij, megjithëse kjo nuk njihet nga shumica dërrmuese e bashkësisë ndërkombëtare.
Palestinezët pretendojnë Jerusalemin Lindor si kryeqytetin e ardhshëm të një shteti të pavarur të tyre. Tensionet janë rritur në lidhje me dëbimin e kërcënuar të familjeve palestineze në rrethin Shaikh Jarrah të Jerusalemit Lindor.
Kombet e Bashkuara thonë se Izraeli duhet të anulojë çdo dëbim dhe të ketë “përmbajtje maksimale në përdorimin e forcës” kundër protestuesve. Lidhja e Shteteve Arabe i ka bërë thirrje bashkësisë ndërkombëtare që të ndërhyjë për të parandaluar çdo dëbim të detyruar. Gjykata e Lartë e Izraelit pritet të zhvillojë një seancë dëgjimore mbi çështjen ligjore të hënën.
