Teksa Coronavirusi po përhapet me shpejtësi edhe në vendin tonë, ku deri tani janë regjistruar 10 raste, nuk mungon lutja publike që bën Ipeshkvi Dom Gjergj Meta.
Kleriku i njohur katolik, përmes një postimi në profilin e Dioqezës së Rrëshenit, ngre duart lart për ti kërkuar Zotit sa më pak të prekur e sa më pak viktima.
Dom Gjergj Meta:
“Një lutje prag mbrëmje …
Lutem që koronavirusi të mos marrë më asnjë jetë,
Por dua që hyrja e tij në jetët tona të na nxisë të ndryshojmë jetë;
Lutem që ky virus të mbarojë sa më shpejt,
Por dua që të mos mbarojë dëshira jonë për t’i dhënë një kuptim jetës;
Lutem që spitalet tona të zbrazen sa më shpejt nga të sëmurët me koronavi,
Por dua që spitalet tona pas kësaj të jenë vendi i kujdesit për njeriun;
Lutem që mjekët dhe infermierët tanë të marrin frymë lirshëm nga lodhja që kanë,
Por dua që e gjitha kjo t’i shtyjë ata drejt humanizmit dhe kujdesit për njeriun;
Lutem që kufijtë tanë të hapen sa më shpejt e të lëvizim të lirë,
Por dua që këto kufij të mos jenë më mure që na ndajnë nga njëri-tjetri;
Lutem që të gjendet sa më shpejt ilaçi kundër koronavirusit,
Por dua që industritë farmaceutike të jenë në shërbim të shoqërisë.
Lutem që sa më shumë ta ndihmojmë njëri-tjerin,
Por dua që kjo të vazhdojë edhe kur koronavirusi të mos jetë më.
Dua dhe lutem. Lutem dhe dua. Lutem sikur gjithçka të varej prej Hyjit e dua sikur gjithçka të varej prej meje.
Ndaj të lutem o Zot! Na ndihmo të bëjmë çka është e duhur e të mos harrojmë çka është me vlerë për vete e për të tjerët. Na jep dashuri për jetën tonë dhe të tjerëve!
Një natë të qetë me Zotin e dashurisë në zemër!”
