Kryeministri Edi Rama ka publikuar foton e një zjarrfikësi në moshë nga Vlora, i cili ka punuar gjatë gjithë ditës së sotme në rrënojat e tërmetit që goditi pjesën qendrore të Shqipërisë, duke shkaktuar dëme të mëdha në Durrës dhe Thumanë.
Postimi i plotë i Ramës:
Në ditë me diell, kjo do të titullohej thjesht, PHOTO OF THE DAY.
Por sonte kjo foto kërkon shpjegim. Ky njeri i zakonshëm i këtij vendi, quhet Luan Kapaj. Zjarrfikës në Vlorë. Qysh pa gdhirë sot, Luani dhe kolegët e tij vlonjatë, ishin përballë gërmadhave.
U gdhi e u ngrys dita dhe ky burrë që s’e njeh askush, nuk rreshti një sekondë, duke u përpjekur të nxjerrë nga duart e vdekjes, jetët e murosura nën pirgjet prej betoni.
E kur fuqitë e tij u duk se shterrën dhe Urgjenca Kombëtare Shëndetësore, e detyroi të shtrihej mbi barelë, vlonjati i paepur refuzoi maskën e oksigjenit dhe u rikthye tek gërmadhat, në kërkim të jetëve që kërkojnë shpëtim! Luani është ende aty, tani që po flasim. Deri në frymën e fundit për frymën e fundit😢🙏
#HERO❤️
