Turqia ka prezantuar disa masa të reja të rrepta për ta ndaluar përhapjen e koronavirusit, pandemisë që ka vrarë mijëra njerëz në gjithë botën.
Presidenti i Turqisë, Tayyip Erdogan njoftoi një orë policore që kufizon personat nën moshën 20-vjeçare që të largohen nga shtëpitë e tyre, përveç në raste nevojash të domosdoshme.
Ai gjithashtu njoftoi një ndalim 15-ditor për daljen dhe hyrjen e automjeteve në 31 provinca, përfshirë Stambollin, si dhe qendrat urbane të kryeqytetit Ankara, Izmirit, Bursës dhe Adanasë, raporton KOHA.
Mbajtja e maskave të fytyrës në zona të frekuentuara me njerëz, përfshirë dyqanet, është gjithashtu e detyrueshme, tha presidenti turk.
Deri më tani, Turqia ka konfirmuar mbi 20.000 raste me COVID-19, ndërsa numri i të vdekurve ka shkuar në 425.
