Ka shkuar në 45 numri i viktimave nga koronavirusi në vend, ndërsa sot ka ndërruar jetë në spitalin Infektiv një 62-vjeçar.
Ministria e Shëndetësisë bën me dije se 62-vjeçari nga Tirana ishte shtruar prej 10 ditësh bë terapi intensive, i intubuar, dhe se nuk ka pasur sëmundje bashkëshoqëruese.
Prej disa ditësh, vendi ynë ka regjistruar një rritje të infektimeve të reja, ku sot u njoftua për 33 persona të sëmurë me COVID-19.
Aktualisht janë të shtruar mbi 80 pacientë në shërbimin infektiv dhe janë mbi 790 raste aktive me COVID19 në vend.
Ministria e Shëndetësisë i bën edhe njëherë apel qytetarëve për respektimin e masave mbrojtëse, duke theksuar se virusi është prezent, ka transmetueshmëri dhe nuk e ka humbur forcën e tij virusale.
Njoftimi i plotë
Rreth dy javë pas shtrimit në spital, pas 10 ditësh në terapi intensive, i intubuar, një 62 vjeçar nga Tirana ka humbur jetën nga COVID19, megjithë përpjekjet e mjekëve, terapisë medikamentoze intensive, pavarësisht se nuk vuante nga sëmundje bashkëshoqëruese.
Ministria e Shëndetësisë i shpreh ngushëllime familjes së të ndjerit dhe i rikujton qytetarëve rëndësinë që ka respektimi i masave mbrojtëse, pasi referuar ekspertëve të Institutit të Shëndetit Publik, virusi është prezent, ka transmetueshmëri dhe nuk e ka humbur forcën e tij virusale.
Nga fillimi i epidemisë, 45 qytetarë e kanë humbur betejën me COVID19. Aktualisht janë të shtruar mbi 80 pacientë në shërbimin infektiv dhe janë mbi 790 raste aktive me COVID19 në vend.
