Anxhela Persiteri arriti të kualifikohet mbrëmjen e djeshme për në finalen e madhe të “Eurovision 2021”, ku do të përfaqësojë Shqipërinë me këngën “Karma”.
Këngëtarja zgjodhi që të performojë vetëm në skenë dhe e gjithë vëmendja ishte tek ajo.
Pas përfundimit të natës së dytë gjysmëfinale, Anxhela iu përgjigj pyetjeve për konferencën për shtyp të mediave.
Secili prej shteteve merr tre pyetje: njërën nga gazetarët e vendit konkurrues, njërën nga mediat kombëtare dhe të fundit nga mediat online.
“Si ndihesh pasi ishe e vetme në skenë dhe ia dole që e gjithë Evropa të votojë për ty dhe Shqipëria të jetë në finalen e madhe?”,- ishte pyetja e parë që iu drejtua këngëtares shqiptare.
“Nuk kam fjalë të përshkruaj ndjenjat e mia tani. Ishte mahnitëse, sepse isha e para dhe nuk e prisja këtë. I dua të gjithë shqiptarët që më votuan, të gjithë shtetet evropiane, jam shumë mirënjohëse. Ndihem shumë e lumtur tani. Faleminderit!”,- u përgjigj Peristeri.
Shtypi ndërkombëtar i Polonisë e pyeti: “Si është ‘Karma’ jote tani?”
Anxhela u përgjigj: “E dua ‘Karmën’ time, do të jem një njeri i mirë për pjesën e mbetur të jetës…”
Ndërsa nga gazetarët e mediave online pyetja ishte: “Si ndihesh tani që Shqipëria është për herë të tretë radhazi në finalen e madhe të ‘Eurovision’”.
“Ndihem e lumtur, sepse Shqipëria e meriton, jemi një vend i vogël, por kemi artistë shumë të mirë. Të gjithë duhet ta njohin vendin tonë dhe muzikën tonë”,- përfundoi Anxhela.
